FICTION & POETRY, 2014

L BRADLÉ DL MOND

Na cuntia

A trëi var de zes per no me lascé udëi, cialovi chieta y nstarida dal viere daviert ora. Stajove mpe t' amesa l blanch de bata imaculeda de standegun. Da dedora audivi, mescedà al busiamënt y ?iramënt di passanc sun la streda pedonela dl zënter de zità, n bradlé adaut che se destacova tlermënter da duc i autri sónns. L univa da na luegia plu auta dla streda, plu avisa, da una dla cëses tla lingia visavis, a manco che vint metri da mé, da n' ëila senteda pra na mëisa de cesadafuech cun i braces flaces tl grëm. Sostlujove i uedli per udëi miec y slungiove l col restan de zes dal viere per no me lascé udëi y vester bona de me strufé ca n fregul de cie che suzedova cun chël' ëila de deguna età. Ne ove mo mei audì na persona chersciuda ora dla nfanzia, no n pop o mut o muta, bradlan nsci, uë dì, adaut y cun sistem. Chël' ëila dai ufs plutosc turonc y dala pel linëusa, cun ciavëi rosc, curc y setii nturtlei artifizialmënter da na permanënta, stajova menadrë ca pesocia bradlan y bradlan. L bradlé adaut fova dla sort y cadënza che n cunësc pra mëndri mez mpermelei y mez descunselei de n cater o cin ani do che n ti à zarà ora dla mans si juech dl mumënt. L ne fova nia tan n bradlé desperà, ma plutosc n bradlé cunturbënt, propi ajache l univa da chël' ëila, y l semiova unì ora dal plu sot dl sot de si ana.

DOWNLOAD